"علّم ولدك... يمكن يخلّصنا من هذا العذاب!"..التعليم.. هو المنقذ الوحيد للجنوب العربي

كتب / جمال علي أبو علي 

في ظل كل التعب والمعاناة اللي يمر بها الجنوب، من مشاكل سياسية واقتصادية، وحياة كل يوم تصعب أكثر من اللي قبله، ما عاد في شي نقدر نراهن عليه غير التعليم.

التعليم هو الأمل، هو الطريق الوحيد اللي ممكن يغير حالنا، ويبني لنا مستقبل نكون فخورين فيه.

كلنا نعرف إن الحرب خرّبت كثير أشياء، بس أكثر شي تأثر هو التعليم. مدارس خربانة، معلمين بدون رواتب، طلاب يمشوا مشي عالأقدام بالساعات عشان يوصلوا المدرسة، ومع هذا كله، ما زالوا مستمرين. ليش؟ لأنهم يعرفوا إن ما فيش أمل غير بالعلم.

التعليم مش بس كتاب ومعلم، التعليم هو اللي يفتح عقولنا، يغير حياتنا، يبعد أولادنا عن الجهل والبطالة، ويصنع لنا جيل قوي، واعي، يعرف حقوقه وواجباته.

الدولة ما راح تقوم إلا برجال متعلمين، وبنات متعلمات، يعرفوا يشتغلوا، ويفكروا، ويبنوا وطنهم بإيدينهم.

يا ناس، التعليم مش ترف، ولا شي نقدر نستغنى عنه. هو السلاح الحقيقي، هو القوة اللي تخلينا نوقف على رجلينا.

لازم نهتم بالمدارس، نوقف مع المعلمين، نطالب بحقوق الطلاب، ونزرع بقلوب أولادنا إن المستقبل يبدى من الصف، من الكتاب، من السبورة.

التعليم هو المنفذ الوحيد للجنوب، هو الباب اللي نقدر نخرج منه للنور، ونقفل ورانا باب الجهل والتخلف والفقر.

خلونا نوقف كلنا يد وحدة، مع الطالب، مع المعلم، مع كل قلم يكتب، لأن التعليم هو خلاصنا الوحيد.