حق الطريق علينا ...

السلام عليكم 

موضوعنا عن الطريق 

نلاحظ من بعض الاشخاص او الأباء من جشعه لدنيا ولطمع الدنيا بيضيق وبيتوسع بتجاه الطريق البعض مع كبر السن بيزيد فيه حب التملك وطمع الدنيا الطريق اخي اوالسبيل انت المستفيد وانا وكل ابناء المنطقه البعض يترك مساحه حق سياره فقط اخي اليوم وضعك مش تمام بكره ايتحسن وضعك اليوم معك سياره بكره اولادك ايشترون بابور او دينه او غاطره اليوم معك سياره ومعك اولاد بكره كل ولد من اولادك ايشتري سياره وتنزاد السيارات وكثافه سكانيه وضروري من توسع الطريق لماذا تضايق الطريق ..الطريق انت واولادك اتستفيدون منها واي شخص يقدم اويتبرع اويوسع للطريق للسبيل جزاه الله خير وهذه هيا الصدقه الجاريه لان ينفعك ابنك اخوك قبيلتك لان ينفعك مال الصدقه هي من تنفعك وافضل صدقه جاريه هي توسعه الطريق ..

الواجب علينا نحن الشباب اذا شفت ابوي او ابوك اوخي اواخوك بيضايق الطريق او معنا درب او سوور حتى اذا كان قديم السوور واجب علينا نحث ابوي وابوك على التوسعه وتفهم ابوك انها صدقه جاريه وان الدنيا فانيه ابوك بيتوسع وبيضيق الطريق كله من اجل اولاده ضروري الاولاد يجلسون مع ابوهم وراح يأثرون عليه اذا استمروا في الكلام معه من اجل اتوسعه الطريق لان الأب بيعمل كل شي من اجل اولاده مستعد يتوسع ويطمع من اجل اولاده لهذا الواجب علينا ان نكون يد خير وان لاتاخذنا العاطفه اوالقبليه ان نوقف مع الخطاء اذا انت قلت له هذا خطاء وهذه طريق واجب نوسع الطريق واجاء غيرك وكلمه وكل شخص يكلمه انه خطاء وضروري من توسعه راح يتأثر ويوسع الطريق لا توقف مع اي شخص يضيق الطريق حتى لوكان ابوك اخوك من قبيلتك لا كلنا ضد هذا ..

 انت غادر تأثر على ابوك بس بعضهم بيقول ماشي اغدر وهم متفاهمين انت غادر اذا كل يوم بتكلمه انت واخوانك وامك و بتلحون عليه وبتكلمونه كل فتره وبستمرار راح يتاثر وراح يدق ويوسع الطريق وبرضه تقول له هذه صدقه جاريه واجر عظيم ((كلنا يدآ بيد من اجل توسيع الطريق ))

واجب علينا نحث ونشجع على التوسعه في الطرقات واجب علينا نتكلم ونشجع في كل موقع وفي كل مقيل وعلى خطباء المساجد ان يوعون الناس في خطب الجمعه ويحثون الناس ويعلمون الناس على هذا العمل على توسعه الطريق وكيف ان اجره عظيم وان اي شخص يضيق طريق انه حرام وان اخر الدنيا حساب والموت يأتي فجائه قدم لنفسك صدقه جاريه وبداء في نفسك ولا تنظر الى شخص المخرب سيبك منه المتر الذي اتقدمه لان تطلع القمر في هذا المتر الذي تتوسع فيه هذا المتر الذي تقدمه اتحصله نور امامك يوم القيامه يوم لاينفع مال ولا بنون ..

والله يجزي كل شخص قدم للطريق الله يجزيهم الخير ويكتب اجرهم فقد فازوا بما قدموه غيرهم يتمنى ان يكون حقه قريب من الطريق من اجل يتبرع للطريق يرد طريق الاخره وجزاكم الله خير

وتحياتي لكم //علي الطيري